Gas Supply to Homes : ఆంధ్రప్రదేశ్ ప్రజలకు త్వరలో పైప్లైన్ ద్వారా వంటగ్యాస్ అందుబాటులోకి రానుంది. రాష్ట్రంలో నిలిచిపోయిన పైప్లైన్ గ్యాస్ సరఫరా ప్రాజెక్టును తిరిగి ప్రారంభించేందుకు మార్గం సుగమమైంది. ఈ ప్రాజెక్టుకు అవసరమైన సుమారు రూ.1,000 కోట్ల ఖర్చును పూర్తిగా భరించేందుకు గ్యాస్ అథారిటీ ఆఫ్ ఇండియా లిమిటెడ్ (GAIL) అంగీకరించింది. దీంతో రాష్ట్ర ప్రభుత్వంపై ఆర్థిక భారం తగ్గనుంది. గతంలో నిధుల కొరత, భూసేకరణ, ఇతర పరిపాలనా కారణాలతో నిలిచిపోయిన పనులు మళ్లీ ప్రారంభం కానున్నాయి. ప్రధానమంత్రి ఊర్జ్ గంగా పైప్లైన్ ప్రాజెక్టులో భాగంగా చేపట్టిన ఈ కార్యక్రమం ద్వారా ఇళ్లకు మాత్రమే కాకుండా పరిశ్రమలు, వాణిజ్య సంస్థలు, రవాణా రంగానికి కూడా సహజ వాయువు సరఫరా చేయాలని ప్రభుత్వం లక్ష్యంగా పెట్టుకుంది. ముఖ్యంగా శ్రీకాకుళం, విశాఖపట్నం, కాకినాడ ప్రాంతాలకు ఈ ప్రాజెక్టు ఎంతో ప్రయోజనకరంగా మారనుంది.

ప్రాజెక్టు వ్యయం మొత్తం గెయిల్ భరించేందుకు అంగీకారం
ఆంధ్రప్రదేశ్లో పైప్లైన్ ద్వారా సహజ వాయువు సరఫరా చేసేందుకు కేంద్ర ప్రభుత్వం 2022లో ఈ ప్రాజెక్టుకు ఆమోదం తెలిపింది. తొలుత ప్రాజెక్టు మొత్తం వ్యయం సుమారు రూ.2,650 కోట్లుగా అంచనా వేశారు. అప్పట్లో కుదిరిన ఒప్పందం ప్రకారం ప్రాజెక్టు వ్యయంలో 50 శాతం రాష్ట్ర ప్రభుత్వం, మిగిలిన 50 శాతం గెయిల్ భరించాల్సి ఉంది. అయితే రాష్ట్ర ప్రభుత్వం తన వాటా నిధులను పూర్తిస్థాయిలో కేటాయించకపోవడంతో పనులు ముందుకు సాగలేదు. దీంతో ప్రాజెక్టు మధ్యలోనే నిలిచిపోయింది. తాజాగా కూటమి ప్రభుత్వం కేంద్రంతో జరిపిన చర్చలు ఫలించడంతో ప్రాజెక్టును తిరిగి ప్రారంభించేందుకు అనుమతి లభించింది. రాష్ట్ర ప్రభుత్వం మొత్తం ప్రాజెక్టు వ్యయాన్ని భరించే పరిస్థితి లేదని కేంద్రానికి వివరించింది. దీనిపై జరిగిన సంప్రదింపుల అనంతరం మిగిలిన పనులకు అవసరమైన సుమారు రూ.1,000 కోట్లను గెయిల్ భరించేందుకు అంగీకరించింది.
Gas Supply to Homes: 965 కిలోమీటర్ల మేర పైప్లైన్ నిర్మాణం
ఈ ప్రాజెక్టులో భాగంగా మొత్తం 965 కిలోమీటర్ల మేర గ్యాస్ పైప్లైన్ నిర్మించాల్సి ఉంది. ఒడిశాలోని దామ్రా నుంచి ఆంధ్రప్రదేశ్లోని వివిధ ప్రాంతాలకు పైప్లైన్ ద్వారా సహజ వాయువును తరలించేలా ప్రణాళిక రూపొందించారు. ఇప్పటికే దామ్రా నుంచి శ్రీకాకుళం వరకు సుమారు 516 కిలోమీటర్ల పైప్లైన్ నిర్మాణ పనులు పూర్తయ్యాయి. మిగిలిన మార్గాల్లో పనులు పూర్తి చేయాల్సి ఉంది. ప్రధానంగా శ్రీకాకుళం నుంచి కాకినాడ వరకు సుమారు 320 కిలోమీటర్ల పైప్లైన్ నిర్మాణం, కాకినాడ నుంచి విశాఖపట్నం వరకు 188 కిలోమీటర్ల మేర పైప్లైన్ ఏర్పాటు చేయాల్సి ఉంది. అలాగే శ్రీకాకుళం-విశాఖపట్నం మధ్య 112 కిలోమీటర్ల పైప్లైన్ నిర్మాణం చేపట్టాల్సి ఉంది. పైప్లైన్ నిర్మాణంతో పాటు సిటీ గ్యాస్ డిస్ట్రిబ్యూషన్ (CGD) నెట్వర్క్ను కూడా రెండు దశల్లో అభివృద్ధి చేయనున్నారు. దీని ద్వారా పైప్లైన్కు అనుసంధానమైన పట్టణాలు, నగరాల్లో ఇళ్లకు నేరుగా గ్యాస్ సరఫరా చేసే వ్యవస్థను ఏర్పాటు చేస్తారు. దీంతో సిలిండర్లపై ఆధారపడే పరిస్థితి కొంతమేర తగ్గడంతో పాటు సహజ వాయువు వినియోగం పెరిగే అవకాశం ఉంది. 2