KTR: బీఆర్ఎస్ వర్కింగ్ ప్రెసిడెంట్ కేటీఆర్, కాంగ్రెస్ పార్టీ అగ్రనేత సోనియా గాంధీని ఉద్దేశించి చేసిన వ్యాఖ్యలు రాజకీయ వర్గాల్లో తీవ్ర చర్చనీయాంశంగా మారాయి. సోనియా గాంధీ రాసిన ‘బిలాంగింగ్: ఎ జర్నీ ఆఫ్ లవ్’ అనే ఆత్మకథలో ప్రత్యేక తెలంగాణ రాష్ట్ర ఏర్పాటు గురించిన ప్రస్తావన లేకపోవడాన్ని ఆయన తీవ్రంగా తప్పుబట్టారు. సోనియా హృదయంలో నిజంగానే తెలంగాణ ఉంటే, ఆ పుస్తకంలో ఆ రాష్ట్ర సాధన గురించి ఎందుకు రాయలేదని ఆయన సూటిగా ప్రశ్నించారు.
తెలంగాణ రాష్ట్రం ఎవరి దయాభిక్ష వల్ల రాలేదని, అది ఇక్కడి ప్రజల సుదీర్ఘ పోరాటాల త్యాగాల ఫలితమని కేటీఆర్ స్పష్టం చేశారు. ‘తెలంగాణ ఇచ్చింది సోనియమ్మే’ అని పదే పదే ప్రచారం చేసుకునే కాంగ్రెస్ నాయకులు ఇప్పుడు ఈ ప్రశ్నకు ఏమని సమాధానం చెబుతారని ఆయన డిమాండ్ చేశారు. ఎక్స్ (ట్విట్టర్) వేదికగా ఆయన ఈ విమర్శనాస్త్రాలను సంధించారు.
ఈ రాజకీయ విమర్శలతో పాటు కేటీఆర్ తన గత ఉద్యమ జ్ఞాపకాలను కూడా నెమరువేసుకున్నారు. తెలంగాణ ఉద్యమ కాలంలో, ప్రత్యేక రాష్ట్ర సాధన కోసం 2011 నవంబర్ 16 నుంచి 21 వరకు తాను చేపట్టిన పాదయాత్రకు సరిగ్గా 15 ఏళ్లు పూర్తయినట్లు ఆయన గుర్తు చేసుకున్నారు. ఉద్యమ అధినేత కేసీఆర్ ఇచ్చిన పిలుపు మేరకు సాగిన ఆ ఆరు రోజుల పాదయాత్ర తన జీవితంలో ఓ అరుదైన, గొప్ప జ్ఞాపకమని కేటీఆర్ భావోద్వేగంతో పేర్కొన్నారు.